Auto Nr. 3 + Hagel = Auto Nr. 4

Soo, ich blogge mal uf schwiizerdüütsch, welli eigentli muess packe für Veeeeegas. Aber ich muess au unbedingt die Story verzelle.

Also, ich ha letschwuche es neus Auto öbercho. Bi Tiptop z fride und es isch praktisch en Neuwage. Wie au immer. Hütt hets wider mal gwittered. Ich bi gad mid em Auto ufem Parkplatz acho und ha id Änglischstund welle. Wells so extrem gschiffed hed und ich eh nochli Ziit gha ha, hani dänkt warti mal besseri Ziite ab. (Falschi Entscheidig)
Ziit isch vergange, besser ischs ned worde. Es hed afo Hagle und de Hagel hed afoh wachse. Naja, spötistens denn hani eh nömm chönne flöchte, sösch hätti ets Büüle ufem Chopf. Büüle hets trotzdem gäh, eifach nur ufem Autodach. De Hagel isch wiiter gwachse und so öppe zwösche Golf- und Tennisball grössi stahblibe. Ich ha scho mal innerlech afo wette, welli Schiibe zerscht bricht. D Rückschiibe hed den gwunne. 😀 D Schärbe flüged also durs ganz Auto und hinenache schüüst de Hagel.

Ich ha mich also ergendwie so halbe ide Fuessrum zwängt (Haha, luschtig :P), well usegah isch ja ebe ned d Lösig gsi. Ja, ergendeinisch isch denn fertig gsi. D Folg vo dem Gspass: Es verbüülts Dach, Bruch vo de Rückschibe, en völlig durchnässte Stefan, en Pool im Auto, Schärbe im Auto, über allne mine Sache und uf mir sälber … und es neus Auto 😀 Amerika-Gewitter live 🙂

Uf jedefall isch de Service schnell gsi. E halbstund spöter hani scho es neus Auto gha. Wieder en Toyota Corolla wie mis Auto Nr. 3. Tiptope Ferieafang. Cha nur no besser cho 🙂 Ich zies ets mal uf Vegas zum mich weder chli tröchne ufwärme.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.